ਜੇਐਲ ਨਿਊਜ਼ / JL NEWS
ਤਰਨਤਾਰਨ (ਪੰਜਾਬ) / 16-09-2022
ਖੇਡਾਂ ਵਤਨ ਪੰਜਾਬ ਦੀਆਂ ਦੇ ਫੁੱਟਬਾਲ ਮੈਚ ਬੀਤੀ ਰਾਤ ਹੋਈ ਦਰਮਿਆਨੀ ਵਰਖਾ ਕਾਰਨ ਅੱਜ ਸੰਭਵ ਨਾ ਹੋ ਸਕੇ। ਜ੍ਹਿਲ੍ਹਾ ਖੇਡ ਅਧਿਕਾਰੀ ਸ੍ਰੀ ਇੰਦਰਵੀਰ ਸਿੰਘ ਨੇ ਦੱਸਿਆ ਕਿ ਜਿਲਾ ਪੱਧਰੀ ਫੁੱਟਬਾਲ ਦੇ ਮੈਚ ਜੋ ਕਿ ਪੁਲਿਸ ਸਟੇਡੀਅਮ ਤਰਨਤਾਰਨ ਵਿਚ ਹੋ ਰਹੇ ਹਨ, ਦੇ ਬੀਤੀ ਸ਼ਾਮ ਕੁਆਰਟਰ ਫਾਈਨਲ ਮਕੁਾਬਲੇ ਮੁਕੰਮਲ ਹੋ ਗਏ ਸਨ, ਜਿੰਨਾ ਵਿਚ ਲੜਕਿਆਂ ਨੇ ਬਹੁਤ ਵਧੀਆ ਖੇਡ ਦਾ ਪ੍ਰਦਰਸ਼ਨ ਕੀਤਾ। ਉਨਾਂ ਦੱਸਿਆ ਕਿ ਅੱਜ ਸਵੇਰੇ ਕੋਚਾਂ ਵੱਲੋਂ ਮੀਂਹ ਕਾਰਨ ਗਿੱਲ ਹੋਏ ਮੈਦਾਨ ਨੂੰ ਵੇਖਦੇ ਹੋਏ ਖਿਡਾਰੀਆਂ ਨੂੰ ਸੱਟ ਲੱਗਣ ਦਾ ਖਦਸ਼ਾ ਜਿਤਾਇਆ ਅਤੇ ਮੈਚ ਅੱਗੇ ਪਾਉਣ ਦਾ ਫੈਸਲਾ ਲਿਆ। ਉਨਾਂ ਦੱਸਿਆ ਕਿ ਬੀਤੀ ਸ਼ਾਮ ਹੋਏ ਫੁੱਟਬਾਲ ਦੇ ਕੁਆਰਟਰ ਫਾਈਨਲ ਜੋ ਕਿ ਸਾਲ 21 ਤੋਂ 40 ਵਰਗ ਦਰਮਿਆਨ ਖੇਡੇ ਗਏ, ਵਿਚ ਕਸੇਲ, ਸੇਰੋਂ, ਨੂਰਦੀ ਤੇ ਪੱਟੀ ਦੀਆਂ ਟੀਮਾਂ ਸੈਮੀਫਾਈਨਲ ਵਿਚ ਪ੍ਰਵੇਸ਼ ਕਰ ਗਈਆਂ। ਉਨਾਂ ਦੱਸਿਆ ਕਿ ਕੁਆਰਟਰ ਫਾਈਨਲ ਵਿਚ ਇਨਾ ਪਿੰਡਾਂ ਤੋਂ ਇਲਾਵਾ ਝਾਮਕਾ, ਖੇਮਕਰਨ, ਘਰਿਆਲਾ ਅਤੇ ਮੀਆਂਵਿੰਡ ਦੀਆਂ ਟੀਮਾਂ ਵੀ ਪਹੁੰਚੀਆਂ ਸਨ, ਪਰ ਵੱਖ-ਵੱਖ ਮੈਚਾਂ ਦੇ ਆਏ ਨਤੀਜਿਆਂ ਅਨੁਸਾਰ ਚਾਰ ਟੀਮਾਂ ਸੈਮੀਫਾਈਨਲ ਵਿਚ ਪ੍ਰਵੇਸ਼ ਕਰ ਗਈਆਂ। ਉਨਾਂ ਦੱਸਿਆ ਕਿ ਅੱਜ ਦਿਨੇ ਮੌਸਮ ਠੀਕ ਰਿਹਾ ਹੈ ਅਤੇ ਰਾਤ ਵੀ ਜੇਕਰ ਮੀਂਹ ਨਾ ਪਿਆ ਤਾਂ ਕੱਲ ਨੂੰ ਮੈਚ ਕਰਵਾਏ ਜਾਣਗੇ।
